ফাঙ্ ফাঙা নাগে

কিশোর মজুমদার

ডিগির ডাঙর ডাঙর মাছ,
আর খ্যাতের ধান
পালং ,পুঁই ,বাইগন, আলু_
নাউ, কুমড়া -জালি _
আর তোর ওই তিন বিঘার ভিটাবাড়ি_
মুই মইরলে কী করবু ক ?

যাবার চাইস যা _
নেকাপড়া কচ্চিস্ শিক্ষিত হচিস
তোক আর আটকায় কায়!

যা _
যায়া শহরত থাক
চাকরি বাকরি বাড়ি ঘর
সুখে শান্তিতে থাকিস বাবা ,

তোক একনা কথা কবার চাং
মুই মইরলে তোর মাকে অ্যাকনা দেখিস
উয়ার হার্টের ব্যারাম
সদায় দিনে ওষুধ খাওয়া নাগে,
খবর দিলে আসিস ।
ওষুদ শ্যাস্ হইলে আনিয়া দেইস।

তোর অ্যাকনা মাত্র বইনি
উয়ার দিনগুজরান ভাল চলে না
উয়ার উদ্দিশ করিস ;
আর ছুটি পাইলে
এইটে আসিয়া থাকিয়া যাইস কয়দিন।
মুই আর তোর মাও
এই ভিটা ছাড়ি যাবার না পাইম

দাদুভাই_
দাদুভাইওক ধরি আসিস _ দ্যাখেয়া যাইস_
তোর মা’র আপশোস্ _
উয়াক ধরি যাইবে দোলের মেলাত্
মুই আর কদ্দিন আছোং
দেখিস সুযোগ পাইলে __

এটেকোনার মানুষজন খ্যাত-খামারি
গরু ছাগল গাছগুলাক ছাড়ির পাইম না মুই _
এইটে কোনার মানসিগুলা মোর জান,
কোনো কিছু হইলে সগায় আসিয়া ঝাপেয়া পড়ে।
উমরাগুলাক ছাড়ি যাবার পাইম্ না মুই।
তুই থাকিস , বউমা -নাতিটাক আদর যত্তন করি দেখিয়া শুনিয়া রাখিস বাবা,
হামাল্লার দিন কাটি যাইবে কোনো মতে
_ শোনেক , গাড়ি বোল সাবধানে চালাইস্
কয়া দিনুং।
নাতিটার বাদে নয়া বকনা কিনিছোং
আইসা মাসোত বাচ্চা দিবে
কাঙো গেইলে মাঝেমাঝে
দুধ পাঠেয়া দিম তোর ওইঠে_
দাদুভাইওক্ খোয়াইস ।

মাঝে মাঝে ফোন করিস
তোর মার সাথে দাদুভাইয়ের কথা কওয়াইস অ্যাকনা ।
এইঠেকোনার
মানসিগুলা বড় কান্দে রে _
এইঠেকোনার গছগুলাও বড় কান্দে,
জমির ধান চায়া চায়া রয়
দিঘির পাড়ত্ চাংড়াত বসিয়া
বাস ঝাড়ের ছেয়াৎ —

ছাড় বাপই , _ তুই যা
শোনেক সাবধানে থাকিস বাবা।

মুই আছোং তোর মাক ধরি
আর তিন-তিন বিঘার ভিটাবাড়ি।
বড়ো ফাঙ্ ফাঙা নাগে রে _
বড়ো ফাঙফাঙা নাগে ।